Orog na nagigin matanog sa ladangan kan tennis an Filipina na si Alex Eala huli sa nakatalaang makahampang kaini si dating worlds no. 1 Venus Williams sa doubles opener kan ASB Classic sa Auckland, New Zealand.
Makikipag-partner si Eala ki Iva Jovuc, kampeon kan 2025 Guadalajara Open, kontra sa duo ninda Williams asin dating world no. 3 Elina Svitolina.
An laban an parte kan women’s doubles round of 16 asin piglalaomang magigin saro sa mga tampok na sagupaan sa torneo.
Apwera sa doubles, nakatalaan mang hampangon ni Eala si Donna Vekic sa saiyang singles opener sa parehong aldaw.
Posibleng maghampang si Eala asin Williams sa sarong blockbuster quarterfinal showdown sa singles kun parehong makakabalyo sa enot na duwang round.
An ASB Classic an nagsisirbing preparasyon ni Eala para sa saiyang main draw debut sa Australian Open na mapuon sa Enero 18, 2026.
Obheto kan Filipina tennis ace na ipagpadagos an saiyang momentum makalihis an matrayumpo na 2025 season kun saen nag-angat ini sa world no. 53 ranking.
