Ilalatag an pulang karpet para sa pag-abot kan Pinay tennis star na si Alex Eala sa 2026 Asian Games, na an opening ceremony sa Linggo sa Nagoya, Japan.
Saro an 21-anyos na si Eala sa listahan kan ‘Athletes to Watch’ na iniluwas kan Olympics website, asin piglalaoman na matao nin marhay na ratsada sa edisyon na ini kan Asian Games.
Segun sa website kan Olympics, saro si Eala sa pinakapopular na tennis players ngonian na dinudumog an saiyang mga laban saen man siya magkawat.
Pigtukoy kan Olympics website an kapangganahan ni Eala sa season na ini, kaiba na an pag-abot niya sa fourth round kan Wimbledon sa London asin third round sa US Open sa New York.
Marhay man an kampanya ni Eala sa mga WTA 1000 events sa Dubai, Indian Wells, asin Miami.
Nakua pa ni Eala an saiyang pinakaenot na WTA singles title sa Mubadala DC Open sa Washington DC kan Agosto.
Sa presente, No. 18 si Eala sa world rankings kaya piglalaoman na siya an magkapot kan No. 1 seed sa Asian Games.
Nagdesisyon si Eala na magliban sa mandatory WTA event na Beijing Open para magkawat sa Asian Games, sa ibong kan mga nagambang na penalty.
Kaiba man sa listahan kan Olympics website sinda gymnast Amanda Yap asin swimmer Russel Pang kan Singapore, cricket player Vaibhab Sooryavanshi kan India, asin iba pang athleta.
