Nagsunad si Senator Erwin Tulfo nin prosopwestong ley na obhetong ibaba an value-added tax (VAT) gikan sa 12% pasiring sa 10% komo kasimbagan sa padagos na paglangkaw kan presyo kan barakalon asin serbisy sa nasyon.
Sa ipigsunad na Senate Bill No.1552 o an prosopwestong “VAT Reduction Act of 2025”, pighurot ni Tulfo na an pagbaba an VAT an direktang makakatabang sa pagpapagian sa pasanon kan mga Pilipino sa mahal na barakalon, pati na man sa pagpapakusog kan saindang kakayanan na magbakal.
Dugang pa kan senador, na imbes na maglaom an mga pinoy sa tabang-pinansiyal kan gobyerno na pwede soboot masayang huli sa posibleng katiwalian, mas marhay nang magtinir an kwarta sa bulsa kan mamamayan.
Mantang tinukoy man kaini na an mas hababang VAT an pwedeng mag-enkaminar nin mas halangkaw na paggastos kan mga konsyumer, na posibleng magdara nin pag-uswag kan ekonomiya.
Sa siring na paagi pwedeng soboot mabawi kan gobyerno an posibleng kakulangan sa kita mantang naghehewas an aktibidad pang-ekonomiya.
Binanggit man ni Tulfo na an Pilipinas asin Indonesia an igwang pinakahalangkaw na VAT sa Timog-Silangang Asya na parehong nasa 12%, mantang an ibang kataid na nasyon an igwang VAT na gikan sa 7% hasta 10% sana.
An VAT Reduction Bill soboot an bako sanang makakatabang sa mga ordinaryong mamamayan kundi pati na man sa pagpapahysar kan pagigin kompetitibo kan nasyon sa rehiyon.
Mientrastanto, nakasaysay sa paliwanag kan prosopwesto na an pagbawas sa VAT an kaayon kan probisyon kan Konstitusyon na nagtatalaan kan sarong progresibong sistema kan pagbubuwis na nagbubusol sa katarungan asin pagkakapantay-pantay sa lipunan.
Siring man an probisyon na nagtatao nin kapangyarihan sa Presidente, sa rekomendasyon kan Secretary of Finance, na paramientras na ibweltada sa 12% VAT kun enkaso matukoy kan ng Development Budget Coordination Committee (DBCC) na maglampas sa ipigtalaang limitasyon kan national deposit.
Marurumduman man na enot nang nagsunad si Cavite 4th District Rep. Elpidio “Kiko” Barzaga Jr. nin suhay na prosopwestong ley na obhetong dagusang halion an VAT asin ibaba an rate kaini sa 0%.
