NAGA CITY- Preparado an Naga Airport Police Station na magtao nin seguridad sa mga pasahero na na-divert an saindang biyahe sa Bicol International Airport huli sa aktibidad kan Bulkan Mayon.
Sa entrevista kan Bombo Radyo Naga ki PCPT Edwin C Regonay an Station Chief, Naga Airport Police Station, sinaysay kaini na igwa sindang marhay na koordinasyon sa CAAP asin sa Bicol International Airport tanganing maakomodar asin maitao an gabos na pangangaipuhan kan mga biyaheros.
Sigun pa ki Regonay, igwang marhay na sistema na pigsusunod tanganing masierto na salbado an mga pasahero palaog asin paluwas nin palupadan.
Katakod kaini, pigsaysay man kan opisyal na igwang 15 na pasahero an nagpa-divert sa Naga Airport gikan sa Bicol International Airport kasuarin sana.
Dugang pa ni Regonay, preparado an saindang personnel sa mga siring na sitwasyon orog na ta dae naman bago sa sainda an pangyayari.
Mientrastanto, liwat na nagpagirumdom an opisyal sa mga pasahero na magsunod sa piglatag na mga panundunan kan Naga Airport siring na sana kan pagbabawal sa pagdara nin mga deadly weapon, Bomb Joke, liquid materials asin iba pa.
Siringman an pag-abot nin pirang oras antes an mismong flights tanganing dae maabala asin mawalat kan biyahe.
Sa ngunyan, hagad na sana ni Regonay an kasalbaduhan kan mga pasahero partikular an mga naapektaran kan aktibidad kan Bulkang Mayon.
