Nagpatanid si Polish Prime Minister Donald Tusk manungod sa posibleng pag-atake kan Rusya gamit an mga drone o rocket sa mga nasyon na miyembro kan NATO na nagsusuporta sa Ukraine, kaiba an Poland.
Segun ki Tusk, posibleng ipahiling kan Rusya na aksidente an nasabing mga insidente tanganing paralisaon an desisyon kan NATO na maghiro kun tamaan an teritoryo kan sarong miyembro kaini.
Sinabi man ni Tusk na mas masakit suboot madeterminaran an mga bagong klase nin jet-powered drones huli ta mas marikas asin mas halangkaw an saindang paglayog.
Segun digdi, nakaresibi an Poland nin intelligence hale sa NATO, Ukraine, asin United States manungod sa sinasabing naglalangkaw na peligro.
Ipigheras man ni Tusk na nakatutok an Russia sa pag-atake sa mga border crossing sa pag-ultanan kan Ukraine asin kan mga kataid kaining European countries tanganing maantala an supply lines pasiring sa Ukraine.
Ipinahayag niya na mabiyahe ini pasiring Kyiv tanganing tukaron ki Ukrainian President Volodymyr Zelenskyy an depensa kontra sa mga bagong klase nin drones asin dugang pang sanctions kontra sa Russia.
Sa ibong kaini, sinabi ni US President Donald Trump na igwa nin “Major progress” sa planong pagtogdok nin permanenteng US army base sa Poland.
Haloy nang hinahagad kan Warsaw an nasabing base bilang dugang na security guarantee kontra sa naglalangkaw na peligro kan Russia.
