Pighayag kan Department of Justice na kaibahan na mapapanimbag sa ley an mga madadakop na indibidwal na pigtatago an puganteng si Charlie ‘Atong’ Ang.
Ini mismo an pigheras ni Justice Spokesperson Atty. Polo Martinez dapit sa usapin kan dae pagpapahiling kan nasambitan na negosyante.
Sigun sa nasambitan na tagapagtaram, posibleng mahampang sa kasong ‘Obstruction Justice’ sa siisay mapatotoohan na nagtatabang para maitago si Atong Ang.
Partikular na kaso sa irarom kan Presidential Decree No. 1829 nagpapataw nin kapadusahan sa mga sangkot na nagpupugol sa imbestigasyon asin prosekusyon kan mga kriminal.
An negosyanteng si Atong Ang an marurumdumang pig-isyuhan na nin ‘arrest warrant’ gikan sa Regional Trial Courts kan Lipa, Batangas asin Sta. Cruz, Laguna.
Nahahampang sa kasong ‘kidnapping with homicide’ asin kidnapping with serious illegal detention’ na may kinaaraman sa pagkawara kan mga sabanungero.
Katakod kaini nagtao nin abiso si Justice Spokesperson Atty. Martinez sa dae muna pagsuko sa ibong inisyung ‘arrest warrant’.
Sigun sa saiya posible asin potensiyal ining maikonsederar na sarong krimen huli ta an nasambitan na warrant ‘court order’ kan husgado.
Dugang pa kan tagapagtaram kan kagawaran na pupwedeng kahampangon an kasong ‘disobedience, asin direct assault against person in authority’, sa irarom kan revised penal code kan ley
Kun kaya nagtutubod ining dehado o dae marhay na lakdang para sa ibong na kampo orog na sa akusado an siring kaining aksyon.
Mientrastanto, pigtawan duon man kan Department of Justice na an naireport na nakaluwas na nin nasyon si Atong Ang dae beripikadong impormasyon.
Alagad basado sa kumpirmasyon kan Bureau of Immigration, mayong nanutaran o nahiling na panibagong ‘travel record’ an nasambitan na pugante.
