NAGA CITY- Maogma an pamayuhan kan Philippine Red Cross Camarines Sur Chapter na magayon an laog kan taon sa sainda.
Sa entrevista kan Bombo Radyo Naga ki Maria Felisa Badiola, Chapter Administrator kan Philippine Red Cross Camarines Sur, sinaysay kaini na paglaog pa sana kan Enero igwang dugo na available sa saindang opisina asin igwang 2 blood letting event na pigkundusir.
Sigun pa ki Badiola, igwa pang blood letting an isasagibo antes na matapos an bulan kan Enero.
An nasambitan ng aktibidad an marhay para sa saindang lado nin huli ta igwa sindang target na dapat maabot kada taon.
Dugang pa kan opisyal, masakit abuton an saindang target alagad piggigibuhan ninda nin paagi.
An importante ngunyan dae sinda nauubusan nin suplay asin mayong nasasayang na dugo na makakatabang sa publiko bako sana sa Camarines Sur kundi sa bilog na Rehiyon.
Pigsaysay pa ni Badiola na dakulang tabang na mismong an mga tawo, organisasyon na an nagre-request para sa blood services nin huli ta aware naman an mga ini sa importansiya kan pagdodonar nin dugo.
Sa paagi kaini, nadudugangan an saindang suplay asin nasisierto na makakatabang sa nangangaipuhan.
Mientrastanto, saro sa mga challenges kan saindang Chapter kun enkaso dae available an blood type na pigre-request sa saindang opisina.
Dae soboot ini malilikayan kun kaya kaipuhan na dagos-dagos sana an mga pigkukundusir na blood letting event kan saindang Chapter.
Sa ngunyan, igwa pang nakalinyadang mga programa sa maabot na mga bulan an Philippine Red Cross Camarines Sur na orog pang makakatabang sa komunidad.
