Pinakusog kan Philippine Red Cross (PRC) asin Department of Education (DepEd) an saindang pagtarabangan tanganing pakusugon an kaaraman manungod sa disaster preparedness asin isulong an diwa nin volunteerism sa mga hoben sa tahaw kan mga huma nin kalamidad arog kan El Niño.
Nakasentro an nasabing kolaborasyon sa pagpakusog kan mga Red Cross Youth (RCY) club sa mga eskwelahan sa paagi kan pagsasanay sa first aid, cardiopulmonary resuscitation (CPR), asin disaster risk reduction and management, kaiba na an pagtulod kan mental health awareness.
Idinugang ni PRC Chairman asin CEO Richard Gordon na katuyuhan kan lakdang na ini na makamukna nin mga estudyante na bako sana handang magligtas nin buhay kundi may sadiri man na kusog-boot na mangataman sa kaligtasan asin pankagabsan na kapakanan kan saindang kapwa.
Ipighayag man ni Education Secretary Sonny Angara an kahalagahan kan pagpatalubo nin bilog asin responsableng mga namamanwaan, orog na sa panahon kan AI kun sain kaipuhan na ibalik an human touch asin kultura nin pagtabang sa sosyedad.
Idinugang man ni PRC Secretary-General Dr. Gwendolyn Pang na mahalaga an papel kan RCY tanganing maisalin sa gibo an mga humanitarian values asin matawan an mga hoben nin oportunidad na mapatalubo an saindang leadership skills.
Pormal na pagtitibayon kan PRC asin DepEd an alyansang ini sa paagi kan pagpirma sa sarong Memorandum of Agreement (MOA) para sa padagos na kooperasyon asin seguridad sa mga eskwelahan sa bilog na nasyon.
