Posibleng imbitaran liwat sa masunod na pagdangog kan Senate Blue Ribbon Committee si dating House Speaker Martin Romualdez o kinatawan kan Securities and Exchange Commission (SEC), sigun sa committee chair na si Senator Panfilo Lacson.
Ini para malinawan an usapin sa pagbakal kan harong asin daga sa No. 30 Tamarind Road, Makati kan 2023, na pigbakal kan kompaniyang Golden Pheasant Holdings Corp., na pagsadiri ni Jose Raulito Paras, na konektado sa dating Speaker.
Sigun ki Sen. Lacson, kun mawot mag-atendir kn dating speaker malugod kaining iimbitaran magpasiring asin ipaliwanag an saiyang panig. Alagad dae soboot ini pupwedeng piriton na magpasiring huli sa inter-parliamentary courtesy.
Iimbitaran man soboot si Paras sa masunod na pagdangog tanganing ipaliwanag kaini an saiyang financial capacity sa pagbakal kan nasambitan na harong na medyo may kamahalan na nagkakantidad kan dae mababa sa P1 billion.
Marurumduman, sa ikawalong pagdangog kan komite sa flood control anomaly kan Lunes naglutang an duwang babaeng testigo asin pig-usisa sa soboot koneksyon ninda dating house speaker asin kontratistang si Curlee Discaya katakod sa pigbakal na harong asin lote soboot ni Romualdez kan Abril 2023 sa South Forbes Park, Makati City. Naireport na an mga Discaya an piggamit soboot “front” sa pagbakal kan nasambitan high-end property.
Alagad, kapwa pigsayumahan ninda Romualdez asin Discaya an mga paratang kontra sa sainda.
Mientrastanto, naenot nang pigsaysay ni Sen. Lacson na posibleng masentro ki dating DPWH Secretary Manuel Bonoan an masunod na pagdangog tanganing linawon an mga isyu sa salang grid coordinates kan flood control projects na nakapalaman sa report kaini ki Presidente Ferdinand Marcos Jr.
Sigun ki Lacson, sa nakalihis na pagdangog pigpahiling ninda Undersecretaries Arthur Bisnar asin Ricardo Bernabe III an datos na nagpapahiling kan malinaw na patten kan salang coordinates. Labi 86 porsyento kan proyekto an may salang impormasyon, kaya sinabing tuyo ini.
Dugang pa ni Lacson, an salang datos pupwedeng dae sana para idiscredit an website na Sumbong sa Presidente, kundi para paluyahon an kaso kontra sa mga “ghost” flood control projects.
Pigpagirumduman kaini si Bonoan na kun mapalusot ini, pupwedeng ma-cite in contempt, maarestar asin madetine sa Senado.
Mientrastanto, pigtawan duon kan Senador na an saindang imbestigasyon in aid of legislation, alagad pupwede man magtao nin lead sa mga nag-iimbestigar.
