Pigreport kan Bureau of Quarantine kan Department of Health na mayo pang nadedetect sa ngunyan na bagong kaso kan Nipah virus sa Pilipinas.
Marurumduman kaya na huring nakapagrehistro kan Nipah virus cases sa Sultan Kudarat kan taong-2014.
Alagad sa ngunyan, sigun ki BOQ officer-in-charge Dr. Roberto Salvado, mayo sindang na-monitor o naharang na nag-abot sa nasyon na infected kan virus gikan sa direct flight gikan India, kun saen nakapagrehistro nin seasonal outbreak kan helang.
Siring man, pigsierto kan bureau sa publiko na igwang mga nakalatag na safety health measures, kaibahan an masusing pagbabantay kan bureau sa mga biyahero na nag-aabot sa mga palupadan asin pantalan 24/7 tanganing mapugolang makalaog asin maglakop an virus sa nasyon.
Apwera digde, igwa man soboot e-Travel system na piggamit para sa border control, health surveillance asin economic analysis.
Sa paagi kan application na ini, marekas na mababantayan an mga pasahero puon sa direct flights pasiring India.
Apwera digde, igwa man nakatalag na inframed thermal scanners sa mga palupadan asin pantalan kun saen igwang nakatalagang duwang BOQ nurses tanganing i-monitor an temperatura kan mga nag-abot na pasahero asin igwa man spotters na masuri kun igwang mga pantal asin iba pang palatandaan o sintomas kan helang na dae pigdeklarar sa e-travel app.
Pigpapalikay man kan BOQ official an publiko orog na kun nagbabiyahe sa mga nasyong igwang history kan virus outbreak.
