Suportado kan Philippine Coast Guard (PCG) an posisyon ni Presidente Ferdinand Marcos Jr na dae basta-basta ideklarar na persona non grata an sisay man na diplomat.
Kasunod ini kan pangapodang ideklarar na persona non grata si Chinese Ambassador to the Philippines Jing Quan huli sa padagos na tensiyon asin ribayan nin mga pahayag sa tahaw kan nagkapirang opisyales kan Pilipinas asin kan Chinese Embassy.
Sigun ki PCG Spokesperson for the West Philippine Sea Commodore Jay Tarriela, maski bukas an Pilipinas sa diyalogo, dae maski nuarin mauntok an ahensiya sa pagprotehir kan derechos asin seguridad kan mga nasasakupang teritoryo.
Katakod kaini, sinaysay ni Tarriela na piglilikayan soboot kan Chinese Embassy Deputy Spokesperson Guo Wei an tunay na isyu: an soboot iligal, agresibo, asin mapanlinlang na mga aksiyon kan nagkapirang barko kan China sa West Philippine Sea.P
ighurot ni Tarriela na nakabase sa mga faktwal na ebidensiya an saiyang mga pigpapahayag, siring kan paggamit kan water cannon, pagbangga, pagtutok kan military-grade lasers, asin delikadong pagmaneobra na nagdadara nin peligro sa mga Pilipinong parasira.
An padagos soboot na dae pagbisto kan China sa United Nations Convention on the Law of the Sea (UNCLOS) asin sa 2016 Arbitral Award an nagdadara nin lamat sa relasyon kan duwang nasyon — asin bako an piggibong transparency kan Pilipinas tanganing depensaran an teritoryo asin mamamayan.
