NAGA-CITY- Nagin matrayumpo an pigkundusir na 23rd Regional Tertiary Schools Press Conference sa Partido State University (ParSU) sa Camarines Sur kan nakalihis na January 28 to 30 .
Sa entrevista kan Bombo Radyo Naga ki Dr. Rafael V. Oñate, PHD, President, Association of Tertiary Schools Publication Advisers of Bicol, Inc., sinaysay kaini na an nasambitan ng aktibidad an pinagpartisiparan kan 30 higher education institutions kun saen labi 300 na delegado an nagralaban-laban sa bilog na Rehiyon.
Sigun ki Oñate, an Regional Tertiary Schools Press Conference an taon-taon na ginigibo tanganing itulod an campus journalism sa rehiyon. An mga kumpetisyon an kinababalihan kan pagsurat, (sports, feature, editorial, column, news writing), cartooning, photojournalism, radio/TV scriptwriting, asin broadcasting.
Apwera digde, ngunyan man na taon pig-introduser an digital competition orog na ta kadakol pagbabago an ginagamit sa ladangan kan journalism.
Mientrastanto, an Bicol University campus journalists an nangibabaw asin nagpahiling nin kahanga-hangang performance sa 23rd Regional Tertiary Schools Press Conference (RTSPC)kun saen naipuli kan mga ini an manlaen-laen na individual asin group awards asin nag- qualify an nasa 20 delegado sa Luzon-wide Higher Education Press Conference (LHEPC) na naka-schedule sa March 17–19, 2026 sa Tuguegarao.
Pinasalamatan man kan CHED an Partido State University, an host-institution, para sa matrayumpo asin marekas na pagresponde sa pangangaipuhan kan gabos na mga nagpartisipar.
Sa ngunyan, pigsierto na sana ni Oñate na magpapadagos an siring na aktibidad para sa pagbusol kan campus journalism sa bilog na rehiyong Bikol.
