Isiniwalat ni Batangas 1st district Representative Leandro Leviste na igwa ining kapot na mga ebidensiya na nagpapahiling kan pag-ako nin kickbacks, na labi pa sa Cabral files.
Ipinaliwanag man man kan lehislador kun tano dae pa kaini ini pigluluwas sa ngunyan sa kadahilanang inabisuhan ini na dae pa ini an tamang panahon tanganing gibuhon ini.
Alagad, nakapreparar na soboot an mga video, tanganing enkaso igwang mangyaring maraot sa saiya an maluwas an katotohanan.
Ginibo ni Rep. Leviste an pahayag kasunod kan claims ni Act Teachers Party-list Representative Antonio Tinio na mas marhay na si Leviste an magbunyag asin magpaliwanag kan laog asin kun pano kaini nakua an mga record kan ribayan nin text messages sa tahaw soboot ninda President Ferdinand Marcos Jr., asin dating legislative liaison officer Adrian Bersamin, na mapatotoo soboot na aram kan Presidente an dapit sa kickbacks gikan sa maanomalyang insertions sa pambansang pondo.
Sigun ki Rep. Tinio, nahiling kaini an mga record kan komunikasyon sa tahaw kan Presidente asin hubin na Bersamin puon Disyembre 2024 hasta Hulyo 2025, na nagdedetalye kun saen eksaktong napasiring an nasambitan ng kickbacks.
Mientrastanto, inamin man ni Rep. Leviste na nagrani sa saiya asin nakiualu an ina kan nagkapirang kongresista kan administrasyon na magpasiring ini sa ibang nasyon asin iuntok an pagbubunyag kan ebidensiya katakod sa mga proponent kan mga maanomalyang proyekto kan DPWH.
Alagad, pighurot kan lehislador na habo kaining magpasiring abroad.
Sa oras soboot na magluwas an ebidensiya, digde soboot maaraman kun tano ini pig-aatake huli ta natatakod sinda na iluwas kaini an mga ini.
Sa ibong kaini, dae soboot ini matitinag sa mga mayong basehang alegasyon asin nagtutubod na maluwas an katotohanan sa tamang panahon.
Naglalaom man si Leviste na maibubunyag an katotohana ninda dating DPWH USec. Roberto Bernardo, dating DPWH Sec. Manuel Bonoan kaibahan an dating mga sekretaryo asin undersecretaries kan Gabinete.
Sa huri, naglalaom si Leviste na mayong testigo an magagadan, mahuhulog sa bangin o mapapatoninong.
Alagad enkaso man soboot na mangyari ini, mas marhay na iwalat an saiyang files, affidavit o recordings sa mapagkakatiwalaang indibidwal tanganing dae mabaon an katotohanan.
