Pinag-aadalan na kan Department of Health (DOH) an pagpapahewas kan zero balance billing policy tanganing masakop naman an mga direct contributor kan PhilHealth na maa-admit sa pay ward o shared rooms kan mga DOH hospital.
Sigun ki Palace Press Officer asin PCO Usec. Atty. Claire Castro, pigpepreparar na ni Health Secretary Teodoro Herbosa an sarong memorandum circular na mag-susugo sa gabos kan DOH hospitals na ipautob ini para sa mga miyembrong otomatikong pigkakaltasan nin kontribusyon, kabali na an mga middle-income earners.
Parte ini kan direktiba ni Presidente Ferdinand Marcos Jr. na siertuhong igwang access an kada Pilipino sa dekalidad na serbisyong pansalud kan tanganing dae magabatan sa gastuson.
Sa ngunyan, sakop kan zero balance billing an mga pasyenteng naka-admit sa basic o ward accommodation sa mga DOH hospital.
