Katuyuhan kan PhilHealth na mabawasan an out-of-pocket health expenditure kan mga pamilyang Pilipino sa 37.8% pag-abot kan 2028. Sa presente, yaon na ini sa 41.2%.
Segun ki Presidente kan PhilHealth na si Dr. Beverly Ho, maabot sa P800 bilyon na pondo an kaipuhan kan ahensya ngani na maabot an target.
An PhilHealth nagproponer nin pag-standardize kan mga propesyonal na bayad para sa mga doktor, pagtao nin paunang bayad sa mga ospital, asin pakikipagtabangan sa mga HMO tanganing mabawasan an gastos sa pasyente.
Pigkokonsiderar man kaini an mas halangkaw na coverage kan PhilHealth para sa mga pasyenteng may comorbidities asin mga gurang, katakod kan Universal Health Care Law.
Aminado si Ho na dawa naglangkaw na an benepisyo kan PhilHealth, dae pa man giraray kaini lubos na nasasakopan an total na gastos kan dakul na pasyente. Katuyuhan ninda na madagdagan an pondo asin sakop tanganing mabawasan an out-of-pocket na gastos kan mga Pilipino.
