NAGA CITY- Pig-istorya kan sarong Pinay an saiyang nagin eksperyensiya kan nagtrabaho sa nasyon kan Iran.
Sa entrevista kan Bombo Radyo Naga ki Erma Cepe, dating OFW sa Iran, sinaysay kaini na dae soboot malikayan na makamate nin pagkatakot huli sa kariribukan sa pag-ultanan kan Iran asin Israel.
Sigun ki Cepe, sa enot mayo man nagin problema huli ta tuninong an palibot alagad kan nagbungkaras an giyera sa pag-ultanan kan nasambitan ng mga nasyon duman na nagpuon na magin maribok.
Dugang pa ni Cepe, nakakaluwas man soboot sinda nin harong alagad piglilikayan an mga public places o mga matatawong lugar huli sa huma kan missiles asin drone attack.
Alagad kan magpuon an protesta asin nagin delikado na an sitwasyon napiritan ini na magtinir sa harong kan saiyang employer para sa saiyang kasalbaduhan.
Kan mag-abot sa punto na mawot na kaining magpuli huli sa naglalalang sitwasyon, tinabangan soboot ini kan saiyang employer sa paagi kan pag-apod sa Philippine Embassy asin pag-apply nin repatriation para sa exit visa.
Matryumpo man na nakabali si Cepe sa 2nd batch kan mga Pilipino na nakapuli sa Pilipinas.
Mientrastantro, pigsaysay man kaini na kadakol pang Pilipino an yaon sa Iran ngunyan kun saen an iba an habo mag-uli sa ibong kan sitwasyon huli ta igwang pamilyang pig-iisip asin halangkaw soboot an sweldo.
Katakod kaini, sa labi tolong bulan na pagtinir ni Cepe sa nasyon, sinaysay kaini na mawot pa man na makabalik sa Iran alagad bako soboot ngunyan huli ta dae pa stable an sitwasyon.
Sa ngunyan, hagad na sana kaini an kasalbaduhan kan kapwa Pilipino na nagtitinir sa nasyon kan Iran.
