Nagsunad si Senator Francis “Kiko” Pangilinan nin prosopwestong ley na matatag kan pinahewas na voucher program para sa mga estudyante sa pribadong eskwelahan gikan sa low-income asin middle-income households.
Sa irarom kan Senate Bill No. 1841 o an “Private Education Voucher Expansions (PEVE) Act” obhetong pahewason an sakop kan tabang pinansyal para sa mga underprivileged na mga estudyante puon kindergarten hasta senior high school na napipiritang maglaog sa pribadong eskwelahan huli sa suruksukan o kakulang kan haraning pampublikong eskwelahan.
Nakapalaog man sa prosopwesto an pag-amyenda o pagbasura sa nagkapirang probisyon kan Republic Act No. 8545 o an Expanded Government Assistance to Students and Teachers in Private Education Act.
Mantang nakabugtak sa explanatory note kan prosopwesto na makakaresebir nin voucher assistante an mga estudyante gikan sa middle-income families basado sa klasipikasyon kan Philippine Statistics Authority (PSA)—na gikan sa mga pampublikong eskwelahang tinukoy kan Department of Education (DepEd) komo congested, o mga nakaistar sa mga lugar na mayong haraning pampublikong eskwelahan asin mawot na mag-enroll sa pribadong eskwelahan.
Mientrastanto, nakasaysay man sa prosopwesto na an tabang sa mga pribadong eskwelahang ma-atendir sa programa an ibabase sa quality assurance standards, pati na man sa hewas kan geographic coverage asin dakol kan mga estudyante na ma-enroll.
Marurumdumang naenot nang naglunsar an DepEd nin classroom leasing initiative komo paramientras na solusyon sa overcrowding sa mga pampublikong eskwelahan mantang pigsasagibo an konstruksiyon kan mga permanenteng eskwelahan, kaibahan an pagpapakarhay kan mga pig-uupahang pasilidad sa mga lugar asin problema sa pagkua nin daga sa pagpapahewas kan pwedeng mapatindogan kan mga eskwelahan.
