Pighurot ni Sen. Erwin Tulfo na mayo ining balak na magdalagan sa 2028 national elections, kasunod kan suhestiyong “Leni-Erwin” tandem kontra ki Vice President Sara Duterte na nagsunad na nin intensiyong magdalagan sa pagka-Presidente.
Sigun ki Tulfo, alagad maski nakakataba nin puso an suhestoyon, mayo ining plano na maglaog sa mas halangkaw na posisyon.
Dae pa soboot tapos an 2025, ibong-ibong na an batikod asin mga kasong pigkakahampang ninda, kaya habo na soboot kan saindang pamilya an panibagong ribok.
Sinaysay man kaining napag-ulayan na ninda kan tugang na si Sen. Raffy Tulfo na dae man ini madalagan sa mas halangkaw na pwesto sa 2028 asin re-election sana an target.
Para ki Tulfo, nakasalalay ki dating Vice President Leni Robredo kun liwat ining madalagan sa pagka-Presidente asin kun sisay an pipilion kaining magin running mate.
Pigsuhestiyon kaini an nagkapirang pangaran siring ninda Sen. Bam Aquino asin Sen. Risa Hontiveros komo mas angkop na pwedeng magin ka-tandem ni Robredo.
Siringman, liwat na pighurot ni Tulfo na sa ngunyan, mayo ining planong magdalagan asin mas pigpipiling maglikay sa panibagong kontrobersiya.
