Inaprobaran kan House Committee on Suffrage and Electoral Reforms an substitute bill manungod sa Anti-Political Dynasty bill.
Nakaresibe ini nin 20 boto gikan sa mga miyembro kan komite, mantang apat an nagkontra.
Segun ki Committee Chairman, Zia Alonto Adiong, pinagsararo kan substitute bill an 25 bersyon kan bill kun saen nangingibabaw an House Bill (HB) 6711 na isinangat ni House Speaker Faustino Dy III asin Rep. Sandro Marcos.
Pigpaliwanag ni Adiong na an HB 6711 an maserbing working draft huli ta ini an nakaresibe nin pinakadakol na suporta.
Sinabi niya na labi sa 100 na kongresista an nagpahayag na nin intensyon na magin co-author kan bill.
Sa irarom kan working draft, an mga paryentes dai tutugutan na magdalagan sa parehong yunit pulitikal sagkod sa ikaduwang grado nin consanguinity o affinity.
