Pigbuyagyag kan Philippine Coast Guard (PCG) Spokesperson for the West Philippine Sea Rear Admiral Roy Vincent Trinidad kan Sabado na an suboot espionage activities kan tolong (3) Pinoy para sa China an mayor na rason kan darakulang bayad, kabali an halangkaw na sweldo asin dakulang bonus hale sa saindang mga Chinese handlers.
Segun ki Trinidad, nagkukua an mga suspechado nin apat hasta anom na numero sa impormasyon na saindang pigtatao, asin darakulang bonus man an saindang nareresibe.
Nadiskubre na an mga bayad ipinapadara sa sainda sa paagi nin mga digital wallet o food courier bilang karibay kan impormasyon na saindang itinao.
Saro sa mga espiya suboot an nakamati nin kasalan makalihis na maheling an pagbangga kan sarong barkong Intsik sa sarong barkong PCG, kun saen nairido an nagkapirang mga personaheng Pilipino.
Sinabi man ni Trinidad na an sarong opisyal kan navy nagreport nin pagprobar na magrekrut nin sarong dayuhan na babae asin na nagpoon siang maghagad nin sensitibong impormasyon.
Sinabi man kan PCG na an recruitment kan mga Pilipino sa navy kasabay kan pagkadiskubre kan soboot mga aktibidad nin pag-espiya kan Tsina, kabali na an kaso ni Alice Guo, an “Palawan 5” na nagbugtak nin CCTV sa palibot kan Ulugan Bay, asin an mga nadakop sa Grande Island asin Chiquita Island.
Segun sa National Security Council (NSC), napundo na an operasyon kan mga suspechado, asin nabisto an gabos na imbweltong Pilipino makalihis na madiskubre an saindang sekretong komunikasyon gamit an sarong gaming app.
Mientrastanto, mahigot na pinahimutikan kan Chinese Embassy sa Manila an mga alegasyon na nagrerecruit an Tsina nin mga Pinoy para magsagibo nin espiyahe sa Pilipinas.
An tagapagtaram kan embahada na si Ji Lingpeng nagsabi na an mga alegasyon gibo-gibo sana. Nag-insistir man siya na an Tsina nagsusunod sa saiyang prinsipyo na dai makiaram sa mga gibo-gibo kan ibang nasyon.
