Nanawagan si Vice President Sara Duterte sa publiko na manatiling mapagmatyag laban sa anumang pagtatangkang baluktutin ang batas para sa pulitikal na interes, kasabay ng unang anibersaryo ng pag-aresto at paglipat sa The Hague ng kanyang ama na si dating Pangulong Rodrigo Duterte.
Sa isang video message na inilabas nitong Miyerkules, sinabi ni Sara Duterte na ang pag-aresto sa kanyang ama noong nakaraang taon ay nagsisilbing paalala na hindi dapat gamitin ang batas bilang sandata para sa personal o pulitikal na layunin.
Ayon sa bise presidente, mahalagang manatiling malaya, tapat, at matatag ang mga institusyon ng bansa upang mapanatili ang katarungan at maiwasan ang anumang pagtatangkang baluktutin ito.
Iginiit din niya na ang paglabag sa karapatan ng isang indibidwal sa pamamagitan ng mga iregular na proseso ay hindi lamang pag-atake sa hustisya kundi hamon din sa pambansang soberanya ng Pilipinas.
Dagdag pa niya, walang Pilipino ang dapat pagkaitan ng due process at ng proteksiyong nakasaad sa Konstitusyon ng bansa.
“Ang isang tunay na malayang bansa ay pinapatakbo ng sariling mga institusyon na malaya mula sa anumang panlabas na panghihimasok o dikta,” ani Sara Duterte.
Hinimok din niya ang publiko na sama-samang itaguyod ang isang Pilipinas kung saan ang batas ay nagsisilbing kalasag ng katarungan at ang soberanya ng bansa ay iginagalang.
Naaresto si dating Pangulong Rodrigo Duterte sa Pilipinas noong Marso 11, 2025 batay sa warrant of arrest na inilabas ng International Criminal Court (ICC). Kasalukuyan siyang nakakulong sa The Hague, Netherlands dahil sa kasong crimes against humanity kaugnay ng umano’y extrajudicial killings sa kampanya kontra droga ng kanyang administrasyon.
Ayon sa rekord ng pulisya, humigit-kumulang 6,000 katao ang nasawi sa drug war, ngunit tinatayang maaaring umabot sa 30,000 ang bilang ng mga namatay ayon sa ilang human rights groups, kabilang ang mga biktima ng vigilante killings.
