Ikukundusir an end-of-school-year assessment para sa implementasyon kan Aral Program sa nagkapirang eskwelahan sa syudad nin Naga antes matapos an school year na ini.
Sa naging entrevista kan Bombo Radyo Naga ki Superintendent Susan S. Collano, Office of the Schools Division Office, sinaysay kaini na nakatalaan na gibohon an assessment sa Marso 18, 2026.
An bilog na resulta piglalaoman na mailuwas pagkatapos kan school year, na hihilingon an progreso kan mga estudyanteng nakalista sa programa.
An assessment may katuyuhan na masukol kun gurano ka-epektibo an programa sa pagtabang sa mga estudyante na mapakarhay an saindang mga kakayahan sa pag-adal bago matapos an presenteng taon nin pag-eskwela.
Base sa enot na datos, dae man dakula an bilang kan mga estudyanteng nakaenrol sa Aral Program sa syudad. Alagad, an mga paratukdo asin mga administrador kan eskwelahan nagmomonitor pa man giraray kan saindang akademikong performance bilang parte kan ebalwasyon kan epekto kan programa.
Kun matapos na an assessment, an mga resulta iyo an gagamiton bilang basehan kun papahiwason pa an implementasyon kan Aral Program sa mga masunod na taon, o kun kaipuhan na bag-ohon ini tanganing magin mas epektibo sa pagsimbag sa mga pangangaipo kan mga estudyante.
