Naniniwala si Manila 3rd District Rep. Joel Chua na ang kinakaharap na impeachment case ni Sara Duterte ay maaari pang magsilbing tulay upang mapalakas ang kanyang posibleng pagtakbo sa pagkapangulo sa 2028.
Ayon kay Chua, may pagkakataon ang Bise Presidente na gamitin ang proseso ng impeachment upang linawin ang mga paratang laban sa kanya at maibalik ang tiwala ng publiko bago ang susunod na halalan.
Ipinaliwanag pa ng mambabatas na kung aabot sa Senado ang kaso at tuluyang maibasura, maaari itong maging mahalagang bahagi ng depensa ni Duterte sa kanyang magiging kampanya.
Sa kasalukuyan, dinidinig pa ang reklamo sa House Committee on Justice, kung saan nakatakdang isagawa ang pormal na pagdinig sa Marso 25. Inimbitahan si Duterte na dumalo, ngunit may mga ulat na maaaring hindi siya humarap.
Binigyang-diin din ni Chua na ang impeachment ay nagsisilbing “pagsubok sa karakter” ng sinumang may ambisyong maging pangulo. Ito na ang ikalawang pagkakataon sa loob ng dalawang taon na nasasangkot si Duterte sa ganitong uri ng proseso.
