Inasegurar kan Department of Trade and Industry (DTI) Camarines Sur na mantenidong estable an presyo asin supply kan mga basic commodities sa ibong kan mga krisis o kalamidad.
Sa intrevista kan Bombo Radio Naga kay Jay Percival Ablan (Provincial Director, Department of Trade and Industry – Camarines Sur), sinabi kaini na regular an saindang pagmonitor tanganing masierto na dae magkakaigwa nin kakulangan sa merkado. Sa Metro Manila, bastante pa man giraray an supply para sa masunod na duwang bulan, mantang sa lokal na merkado igwang ready stock na nagtitinie sa laog nin tolo hasta apat na semana.
Sa ibong kaini, aminado an DTI na may epekto an paglangkaw kan presyo kan krudo sa mga micro, small, and medium enterprises (MSMEs). Kabali digdi an naglangkaw na gastos sa paghatod na minapoon sa 5 sagkod 15 porsyento kan total na gastos sa produkto. Apektado man an mga MSMEs na may mga parabakal hale sa Metro Manila, Cebu, asin iba pang parte kan nasyon huli sa halangkaw na gastos sa transportasyon. Dawa an nagkapirang sektor nin produksyon na nagsasarig sa gasolina asin kuryente nakakaeksperyensya nin dagdag na pagabat.
Sa ibong kaini, nahihiling kan DTI an renewable energy bilang sarong importanteng solusyon tanganing mabawasan an sobrang pagsarig kan nasyon sa imported fuel. Sa ngonian, igwa nang 500 megawatts na operational solar power plants, asin mas dakol pa an piglalaoman na madagdagan kan offshore renewable energy projects sa San Miguel Bay Area na nagkakantidad nin trilyon pesos.
Segun sa ahensya, panahon na para magtutok an gobyerno sa alternatibong enerhiya arog kan solar asin wind power, siring man sa paggamit nin electric vehicles, tanganing magkaigwa nin kontrol sa mga presyo asin dae lubos na maapektaran kan global na paglangkaw kan presyo kan krudo.
