Nabigo si Alexandra “Alex” Eala na makausad sa susunod na round ng Stuttgart Open matapos siyang talunin ni Leylah Fernandez sa straight sets, 1-6, 4-6, sa Round of 32 nitong Martes sa Stuttgart, Germany.
Maagang nakuha ni Fernandez ang kontrol ng laban matapos umarangkada sa 5-0 kalamangan sa unang set bago pa man makapuntos si Eala. Bagamat nakapuntos ang Filipina, agad ding tinapos ng kalaban ang set sa sumunod na laro.
Sa ikalawang set, nagpakita ng mas matibay na simula si Eala nang kunin ang unang game. Gayunman, mabilis na bumawi si Fernandez at nagtayo ng 3-1 abante upang muling dominahin ang laban.
Tinangkang habulin ni Eala, na kasalukuyang nasa world No. 45, ang kalamangan at nakadikit pa sa iskor. Ngunit nanatiling kalmado si Fernandez at nakuha ang mahahalagang puntos upang mapalapit sa panalo.
Nagpakita pa ng paglaban si Eala sa dulo sa pamamagitan ng sunod na panalong games, subalit hindi ito naging sapat upang mapigilan si Fernandez, na tuluyang nagselyo ng kanyang panalo.
Sa kabila ng pagkatalo, patuloy na nagpapakita ng potensyal si Eala sa international tennis scene laban sa mga mas mataas na ranggong manlalaro.
