Pinahimutikan kan Malacañang an mga alegasyon nin destabilisasyon asin nanindugan na matapos na si Presidente Ferdinand R. Marcos Jr. Ini an sinabi ni Palace Press Officer Undersecretary Claire Castro makalihis na iluwas an testimonya ni Ramil Madriaga sa House impeachment hearing.
Sigon ki Madriaga, nagkaigwa suboot nin urulay an kampo ni dating Presidente Rodrigo Duterte asin nagkapirang mga retiradong heneral para sa plano na pwersahan na haleon sa pwesto an Presidente pag-abot kan 2025.
Piglinaw ni Castro na mayo man nin personal na kaaraman an Presidente o an Palasyo sa mga nabuyagyag na orolay ninda Madriaga asin kan dating Presidente.
Sinabi ni Castro na nagkampanya an Presidente para sa mga tawo, nangako na magseserbi sa mga tawo, asin nangako na matatapos an saiyang termino para sa mga tawo.
Pigsierto man kan opisyal na dawa nakatutok an Presidente sa saiyang trabaho, dae babaliwalaon kan gobyerno an siring na seryosong huma.
Aaramon suboot kan gobyerno an bilog na katotoohan sa likod kan mga alegasyon na ini tanganing mamantenir an seguridad kan jefe ejecutivo asin an estabilidad kan nasyon.
