Ihahain ng Spain sa European Union ang panukalang wakasan ang EU–Israel Association Agreement dahil sa umano’y paglabag sa international law, ayon kay Spanish Prime Minister Pedro Sánchez.
Sa isang political rally sa Andalusia, sinabi ni Sánchez na isusumite ng kanyang gobyerno sa EU ang panukala sa Martes, at nanawagan siya sa ibang miyembrong bansa na suportahan ito.
Binigyang-diin niya na ang hakbang ay hindi laban sa mga Israeli citizen kundi sa mga aksyon ng kanilang pamahalaan, na aniya ay lumalabag sa international law at mga prinsipyo ng EU.
Ang EU–Israel Association Agreement, na ipinatupad noong 2000, ang nagsisilbing balangkas ng kalakalan at kooperasyon ng EU at Israel, ngunit maaari itong suspendihin kung may paglabag sa human rights clause.
Ayon sa ulat, nanawagan din si Sánchez sa iba pang bansa sa EU na suportahan ang panukala sa gitna ng lumalakas na debate sa bloc tungkol sa relasyon nito sa Israel.
Bumuwelta naman si Israeli Foreign Minister Gideon Sa’ar at tinawag na “hypocritical” ang Spain, kasabay ng pagbibigay-diin sa ugnayan nito sa ibang bansa tulad ng Turkey at Venezuela.
Inaasahang tatalakayin ang panukala sa susunod na pagpupulong ng EU foreign ministers, kung saan hati ang posisyon ng mga miyembrong estado sa isyu.
