Inanunsyo ni US President Donald Trump na pinalawig niya ang umiiral na ceasefire sa pagitan ng Estados Unidos at Iran, kasunod ng panawagan ng Pakistan at habang hinihintay ang isang “unified proposal” mula sa Tehran.
Ayon kay Trump, mananatiling epektibo ang tigil-putukan hanggang sa makapagpasa ang Iran ng kanilang panukalang kasunduan at matapos ang negosasyon “one way or the other,” habang nananatiling nakaantabay ang militar ng Estados Unidos.
Sa kanyang pahayag, sinabi ni Trump na inatasan niya ang U.S. military na ipagpatuloy ang blockade at manatiling handa, habang isinasagawa ang pinal na pag-uusap hinggil sa posibleng kasunduan sa Iran.
Sa gitna nito, nananatiling hindi tiyak ang direksyon ng peace process dahil papalapit na ang pagtatapos ng dalawang linggong ceasefire. Nag-aalangan pa ang Iran na sumali sa panibagong negosasyon, at binanggit ang umano’y “unacceptable actions” ng Estados Unidos, kabilang ang nagpapatuloy na blockade sa Strait of Hormuz.
Ulat din na kinansela ni JD Vance ang nakatakdang pagbisita sa Pakistan para sa ikalawang yugto ng usapan, habang patuloy ang konsultasyon ng iba pang opisyal ng U.S. hinggil sa susunod na hakbang sa peace talks.
Samantala, patuloy ang pagsisikap ng mga opisyal ng Pakistan na mamagitan at mapagkasundo ang dalawang panig upang maiwasan ang posibleng muling pagputok ng labanan.
Sa kasalukuyan, nananatiling bukas ang posibilidad ng panibagong negosasyon o paglala ng tensyon, depende sa magiging tugon ng Iran at Estados Unidos sa mga susunod na araw.
