Sinabi ni Department of Justice (DOJ) acting Secretary Fredderick Vida na unti-unti nang nabubuo ng mga awtoridad ang impormasyon tungkol sa kinaroroonan at galaw ni dating kongresista Elizaldy Co sa Europa matapos ang koordinasyon sa mga opisyal ng Czech Republic.
Ayon kay Vida, nakakuha ang DOJ delegation ng “workable intel” na tumutulong para mas maintindihan kung paano lumabas ang mga ulat na nakita at nakasalamuha si Co ng mga awtoridad sa rehiyon.
Sinabi niya na mas malinaw na ngayon ang mga detalye at datos kaugnay ng presensya ng dating mambabatas sa Europa, at umaasa silang matutukoy ang eksaktong kinaroroonan nito sa mga susunod na araw.
Kasama rin sa hakbang ng DOJ ang pakikipag-ugnayan sa Czech authorities upang personal na makita at makumpirma ang impormasyon kaugnay ng kaso ni Co na may kinalaman sa umano’y maanomalyang flood control projects sa Oriental Mindoro.
Nasa Prague na rin ang Philippine Center on Transnational Crime team upang tumulong sa koordinasyon at dalhin ang mga dokumentong magpapabilis sa proseso ng red notice request sa Interpol na unang isinampa noong Nobyembre.
Ayon kay Vida, patuloy na binubusisi ng DOJ ang lahat ng datos at impormasyon mula sa immigration at police authorities sa Czech Republic, at layunin nilang buuin ang kabuuang larawan ng galaw ng dating kongresista.
Tumanggi siyang magbigay ng karagdagang detalye habang isinasagawa ang beripikasyon, ngunit tiniyak niyang magpapatuloy ang koordinasyon at hindi sila uuwi na walang resulta.
