Pig-asegurar kan sarong abogado na an mga lakdang na ginigibo kan kampo ni Bise Presidente Sara Duterte laban sa mga institusyon na imbwelto sa impeachment proceedings, kabali na an Anti-Money Laundering Council (AMLC), Kongreso, asin iba pang opisyales kan gobyerno, mayo nin solidong legal na basehan.
Sa intrevista kan Bombo Radyo Naga ki Atty. Dino De Leon (Legal Counsel of Mamamayang Liberal Partylist Rep. Leila De Lima), , malinaw sa ley na bakong absoluto an Bank Secrecy Law asin may hayag na exception para sa impeachment proceedings.
Pigduon man kaini na dae man direktang pinaluwas an sadiring bank accounts ni Duterte kundi mga report sana nin mga kaduda-dudang transaksyon, na suboot nasa laog kan mandato kan AMLC.
Dugang pa kan abogado, may kapangyarihan an Kongreso na magsagibo nin imbestigasyon asin magpaluwas nin subpoena bilang parte kan mandato kaini sa irarom kan Konstitusyon. Segun sa saiya, kun dae magsunod an AMLC sa orden kan Congreso, posibleng ma-held in contempt.
Tinawan duon man ni De Leon na igwa nin presumption of regularity sa saindang mga trabaho an mga opisyales na kinasuhan, kun kaya halangkaw an lebel kan ebidensiya na kaipuhan tanganing patunayan na nagkasala sinda.
Sinabi niya na an pagiging bukas sa public scrutiny parte kan pagiging sarong public servant, lalo na kun igwa nang eksistidong mga alegasyon na may basehan.
Sinabi man kaini na igo na an “actionable evidence” na nagserbing basehan kan Kongreso sa paghagad kan mga report kan AMLC, kaya dae pwedeng ibilang na arbitraryo o abusado.
Sigon ki De Leon, dawa pig-aasumir na donasyon an pondo, pwedeng posibleng pagbalga man giraray ini sa mga ley arog kan Anti-Graft and Corrupt Practices Act kun naresibe ini mantang nasa pwesto sa gobyerno.
Pigduon man kaini an kahalagahan kan pagdeklara sa Statement of Assets, Liabilities, and Net Worth (SALN), siring man an pagbayad kan magkakanigong buwis kun igwa man nin mga donasyon na maresibe.
Sa isyu kan posibleng kahagadan nin Temporary Restraining Order (TRO), sinabi ni De Leon na kinakaipuhan an malinaw na “right in esse” o malinaw na deretso para ini maitao kan Korte Suprema.
Nagtutubod si De Leon na dae makakaapektar sa progreso kan impeachment proceedings an mga isinangat na kaso.
Tinawang-duon kaini na importante an accountability kan mga opisyales kan gobyerno asin pagsunod sa Konstitusyon tanganing mamantenir an tiwala kan publiko sa gobyerno.
