Matrayumpong asin marahay an pagpuon kan pinakaenot na International Hot Air Balloon Festival sa syudad nin Naga.
Sa intrevista kan Bombo Radyo Naga ki Raynor Rodriguez, CDRRMO Head – syudad nin Naga, sinaysay kaini na labi sa sampulong hot air balloons an matrayumpong nailunsar kasubagong aga. An programa nagpoon mga alas 6:15 nin aga asin an mga lobo sa katapustapusi nahiling na nag-itaas mga alas 6:45 nin aga.
An aktibidad nag-atender man nin marhay kan mga paradalan, na may pigkakarkulong 4,000 sagkod 5,000 katawo an nag-atendir, base sa bilang kan mga tiket na naipabakal. An nagkapira sa mga bisita nag-abot nin mas amay, mga alas 2:30 nin aga, tanganing malikayan an halawig na pila.
An bilang kan mga tawo temporaryong nagnipis kan bandang pagka-udto huli sa grabeng init asin kakulangan nin mga pasilidad arog kan tukawan asin mga lugar na malipot. Alagad, an mga bisita piglalaoman na magdagsa giraray ngunyan na hapon para sa mga nakaiskedyul na konsyerto na mapoon sa alas 5 o alas 6 nin hapon.
Segun sa medical team, mayo nin naikurit na seryosong insidente. Kabali sa mga kaso iyo an pagkahilo kan nagkapirang aki asin pagal kan duwang senior citizens, na tulos na tinawan nin first aid.
Apat na medical station an preparado sa lugar, kabali na an mga grupo hale sa lokal na gobyerno, pulis, asin Bureau of Fire Protection, para maseguro an kaligtasan kan mga nag-atender sa bilog na tolong aldaw na selebrasyon.
An mga bisita sa masunod na mga aldaw pinapagirumdom na mag-andam na magduman sa lugar nin amay, magsulot nin magaan na gubing, asin magsierto nin igong pahingalo. Piglalaoman man an mas dakol na tawo sa mga masunod na aldaw, orog na ta igwa nin libreng konsyerto sa enot na aldaw na ini kasabay kan tourism branding event kan syudad.
An mga pagbiyahe sa hot air balloon magpapadagos sa masunod na duwang aldaw, kun saen an mga may kapot nin tiket makakalaom kan parehong eksperyensya, mantang an mga tampok na palabas asin mga paratugtog magkakaiba-iba kada banggi.
