Nangapudan si Presidente Ferdinand Marcos Jr. sa mga lideres kan mga nasyon sa Southeast Asian na padalion an kooperasyon sa rehiyon sa enerhiya asin seguridad sa pagkakan sa tahaw kan epekto kan mga iriwal sa bilog na kinaban asin paglangkaw kan presyo kan langis.
Ginibo kan Presidente an pahayag sa 48th ASEAN Summit sa Cebu kun sain nagkaoroyon an mga miyembrong nasyon kan ASEAN na pakusugon an resilience kan rehiyon kontra sa epekto kan tensyon sa Middle East asin global economic instability.
An mga lider kan ASEAN nagsabi na an seguridad sa enerhiya, seguridad sa pagkakan, asin pagprotehir sa saindang mga namamanwaan sa ibang nasyon iyo an kabali sa mga mayor na pokus.
Napag-olayan man an pagparikas kan implementasyon kan ASEAN Power Grid, sarong rehiyonal na proyekto na iyo an magkokonektar kan mga power network kan mga miyembrong nasyon tanganing mapakarhay an access sa mas abot-kayang kuryente para sa haros 700 milyones katawo sa rehiyon.
Pigtutulod man kan PBBM an tulos na ratipikasyon kan ASEAN Framework Agreement on Petroleum Security (APSA) tanganing matabangan an mga miyembrong nasyon sa panahon nin kakulangan sa supply nin langis.
Segun sa Presidente, napag-orolayan man kan mga lideres an pagpahiwas kan mga proyekto sa renewable energy arog kan hydropower, solar, wind, asin maging nuclear energy, sa tabang kan Asian Development Bank.
Sa isyu kan seguridad sa pagkakan, sinabi ni Marcos na an paglangkaw kan presyo kan langis asin pagkadisturbo kan mga ruta nin barko igwa nin dakulang epekto sa mga harong sa Southeast Asian.
Huli kaini, nagkaoroyon an mga lideres kan ASEAN na pakusugon an reserbang kakanon sa rehiyon, suportaran an mga paraoma asin agri-businesses, asin papagdanayon na bukas an trade flows sa panahon nin krisis.
