Nahulog an sarong L300 van na may lunad na pamilya hale sa Manila pasiring sa Libon, Albay sa sapa sa kalabaan kan Maharlika Highway sa banwaan kan Milaor, Camarines Sur makalihis na suboot makaturog an driver mantang nagbibiyahe.
Sa intrevista kan Bombo Radyo Naga ki PMAJ Rosalinda P. Moises, OIC, Milaor MPS, sinaysay kan mga responders na sarong concerned citizen an nagsumbong kan insidente. Basado sa inisyal na imbestigasyon kan mga otoridad, nawaran nin control sa manibela an driver makalihis na suboot makaturog sa tahaw kan halawig na biyahe hale sa Manila.
Igwa nin tolong pasahero sa lunadan—sarong 42-anyos na lalaki, sarong 17-anyos na tin-edyer, asin sarong 7-anyos na menor de edad. Segun sa mga awtoridad, nagbaliktad an behikulo makalihis na makabangga sa sarong barrier antes na bumagsak sa creek.
Segun sa mga nagresponde, hababaw sana an tubig sa creek huli sa summer season ngonian, kaya bako man seryoso an lugad kan mga pasahero. Pigkakarkulong hanggang tuhod sana an rarom kan tubig sa pinangyarihan kan insidente.
Sinabi man kan mga otoridad na mayong nakuang mechanical damage sa vehiculo asin pagal asin pagturog kan driver an mayor na causa kan aksidente. Mayo nin piglalaoman na kaso na isasangat huli ta pigkokonsiderar ining self-inflicted accident.
Mientrastanto, segun ki Lito Garcia kan Truck Page, buminagsak an sarong boom truck na ginamit sa towing operation mantang pighihingowang buhaton an L300 Van,
Naitala an insidente huli ta dae kaya kan boom kan behikulo an gabat kan van na inaalsa. Huli kaini, an boom nag-abot nin harayo asin dai na nakabalik sa orihinal na posisyon kaini sagkod na ini sa katapustapusi nagtao asin narumpag.
Makalihis an insidente, binutong an behikulo paluwas sa sapa asin ibinalyo sa tinampo tanganing ihatod sa repair shop.
Mientras tanto, liwat na nagpagirumdom an mga awtoridad sa mga motorista na nag-aagi sa may Maharlika Highway sa halawig na byahe. An ibang parte kaini midbid sa tultol asin halawig na mga tinampo na nagigin dahelan nin pagturog asin sobrang rikas.
Pinapagirumduman man an publiko na mag-ingat sa pagmamaneho, lalo na sa halawig na byahe hale sa Metro Manila pasiring sa rehiyong Bicol.
