Pormal na pigdeklarang “insurgency-free” an banwaan nin Pamplona makalihis na makua an estado nin Stable Internal Peace and Security (SIPS), segun ki Mayor Manuel “Boss Awe” Agustin. Sinabi kan alkalde na an naginibohan na ini resulta kan pagkasararo asin pagtatarabangan kan lokal na gobyerno, Philippine National Police, Philippine Army, asin kan mga namamanwaan.
Segun ki Mayor Agustin, dakulang lakdang an deklarasyon na ini para sa lubos na paghale kan huma nin insurhensya asin pagmantenir kan paz y orden sa Pamplona. Pigtawanduon man kaini an importansya kan aktibong partisipasyon kan lambang sektor para mamantenir an seguridad asin pag-uswag sa saindang banwaan.
Dugang pa kan alkalde, sa irarom kan deklarasyon kan SIPS, mamamatian kan mga residente an tunay na pag-uswag kan saindang munisipyo. Sinabi pa kaini na piglalaoman na mas marikas an implementasyon kan mga proyekto asin serbisyo na makakatabang sa kabuhayan asin karahayan kan mga namamanwaan.
Mientrastanto, sinabi man ni Alkalde Agustin na nagsumiter na ini nin request para sa pondo na nagkakantidad nin P150 million sa irarom kan National Task Force to End Local Communist Armed Conflict o NTF-ELCAC. An pondo na ini nakatalaan para sa mga barangay kan Tampadong, Calawat, asin San Vicente tanganing suportaran an saindang mga pangangaipo asin mga proyekto sa pag-uswag.
Naglalaom an alkalde na maiimplementar na sa masunod na taon an nasabing pondo na orog na mas matabangan pa an tolong barangay. Sa paagi kaini, piglalaoman na orog pang mapapakusog an katoninongan, pag-uswag, asin pagkasararo sa bilog na banwaan nin Pamplona.
