Nakarekord an Bulkang Mayon nin duwang insidente nin minor strombolian activity kan Huwebes na banggi, segun sa Philippine Institute of Volcanology and Seismology (PHIVOLCS).
An enot na aktibidad nangyari kan mga alas 8:41 nin banggi, na sinundan nin saro pang pagtuga kan mga alas 9:58 nin banggi.
Naobserbaran man an dalagan kan lava asin an pagbagsak kan nagkapirang materyales hale sa bunganga kan bulkan, na nagin dahelan kan mga collapse-fed pyroclastic density currents (PDCs) sa Bonga Gully mga alas 9:48 nin banggi.
Segun sa PHIVOLCS, inaapod man na “uson” an mga PDC, na halong mainit na gas, abo, asin mga gapo na marikas na nagbaba sa bakilid kan bulkan.
Sinabi kan PHIVOLCS na an effusive eruption kan Mayon nagpadagos sa ika-136 na magkasunod na aldaw, na nagprodusir nin incandescent lava flows, rockfalls, asin an padagos na pagporma nin pyroclastic density currents.
Mantenidong epektibo an Alert Level 3 sa Bulkan Mayon, boot sabihon mahigpit man giraray na ipinagbabawal an paglaog sa 6-kilometer na Permanent Danger Zone huli sa nagpapadagos na huma nin biglang pagtuga kan bulkan.
