Duwang magkasuhay na insidente nin pagkalamos an naitala sa kalabaan kan baybayon kan Balogo na imbwelto an mga biktima hale sa ibang banwaan, segun sa mga awtoridad.
Sa intrevista kan Bombo Radyo Naga ki Arnel Ama, Barangay Kagawad Balogo, Pasacao, sinaysay kaini na sa enot na insidente, sarong 35-anyos na lalaking taga-Ocampo an nakuang gadan na makalihis na malunod mantang nagkakarigos sa dagat. Sa ika-duwang insidente, enot nang naireport na nawawara an sarong 26 anyos na lalaki hale sa Minalabac antes pa man sa katapustapusi nakua an saiyang bangkay makalihis an search and rescue operations kan mga awtoridad.
Basado sa inisyal na imbestigasyon, nagluluwas na dae tataong maglangoy an biktimang taga Minalabac na iyo an pigkokonsiderar na saro sa mayor na rason kan trahedya. Parehong lalaki an mga biktima asin parehong pigdeklarang gadan makalihis an mga insidente.
Ilinadawan kan mga awtoridad an kamugtakan kan dagat sa lugar na nakakadaya, na an nagkapirang parte hababaw alagad may biglang pagrarom asin makusog na mga sulog sa irarom. An operasyon nagin agyat man sa mga responders gikan sa MDRRMO, PNP, Philippine Coast Guard, asin maritime units huli sa pagka-ati-ati kan tubig asin kusog kan alon.
Sigon ki Ama, an nagkapira sa mga insidente sa lugar parateng nangyayari kun banggi o sa mga oras na dae lubos na pigbabantayan an mga nagkakarigos, posibleng may koneksyon sa kapagalan o pag-inom nin arak.
Pighiras man ni Ama na an siring na mga pangyayari nagdadakol sa katapusan kan May, kun an mga turista asin mga ekskursyonista nagdadagsa sa mga baybayon. Sa ibong kan mga pagirumdom kan barangay, dakol pa man giraray an sinasabing nagkaakrigos sa dagat dawa dae tatao maglangoy o dawa bakong salbado an kamugtakan kan panahon.
Liwat na pigtawan duon kan mga awtoridad an importansya kan pag-iingat sa paglangoy, orog na sa mga dae sanay sa dagat, asin pagsunod sa mga patanid kan lokal na gobyerno tanganing maibitaran an kaparehong trahedya.
