Naglunsar an Home Development Mutual Fund (Pag-IBIG Fund) =nin sarong bagong programa sa pagpautang na inaapod na Special Assistance for Financial Emergency (SAFE) Loan tanganing tabangan an mga miyembro na masimbagan an tulos na mga pangangaipo pinansyal mantang nagdadakula an mga gastos kan mga pamilya huli sa epekto kan iriwal sa Tahaw na Sirangan. Sa irarom kan programang ini, an mga kwalipikadong miyembro pwedeng mangutang nin sagkod sa ₱10,000 o sagkod sa 90 porsyento kan saindang total na regular na tinipon sa Pag-IBIG, kun arin an mas hababa.
An SAFE Loan igwa nin taonan na interes na 5.95% asin pwedeng bayadan sa laog nin saro, duwa, o tolong taon, depende sa piniling termino kan miyembro. An mga miyembro na igwa nang eksistidong Multi-Purpose Loan o Calamity Loan hale sa Pag-IBIG Fund pwede man maka-avail kan SAFE Loan.
Segun ki Jose Ramon Aliling, Secretary kan Department of Human Settlements and Urban Development asin Chairman kan Board of Directors kan Pag-IBIG Fund, an programang ini saro pang paagi tanganing matawan nin praktikal na tabang an mga miembros. Sinabi niya na an SAFE Loan may katuyuhan na matawan nin abot-kayang suportang pinansyal an mga kwalipikadong miyembro para sa saindang tulos na pangangaipo mantang padagos na namamatean kan nasyon an epekto kan tensyon sa Middle East sa presyo kan gasolina, kuryente, transportasyon, asin iba pang mga basic expenses.
Mantang may senyales na posibleng nagluluya na an tensyon sa ibang nasyon, sinabi kan Pag-IBIG Fund na posibleng maghaloy bago makabalik sa normal an presyo kan lana asin iba pang kaugnay na gastos. An kantidad na pwedeng utangon kan sarong miyembro nakabase sa saiyang natatadang kapasidad sa pag-utang gikan sa saiyang regular na mga tinipon tanganing magtiner sa laog kan 90% na limitasyon na itinalaan para sa gabos na panandaliang pautang.
Bukas an aplikasyon para sa SAFE Loan sagkod sa Setyembre 8 sa paagi kan Virtual Pag-IBIG o sa arin man na sanga kan Pag-IBIG Fund sa bilog na nasyon. An mga kita sa pautang pwedeng ibugtak nin direkta sa Pag-IBIG Loyalty Card Plus kan miyembro. Susog ki Marilene Acosta, an hababang interes, nababaluktot na mga termino nin pagbayad, asin tolong bulan na grasya bago magpoon an pautang an naggigibo kaini na mas abot-kayang opsyon kisa sa kadaklan na iba pang mga pautang na cash. Idinugang nia na an bulanan na hulugan para sa ₱10,000 na utang na binabayadan sa laog nin tolong taon puede sanang umabot sa mga ₱308 kada bulan. Inenkaminar man kaini an mga parautang na gibohon an saindang pagbayad nin tama asin sa tamang panahon tanganing an pondo padagos na makatabang sa mas dakol na mga trabahador na Pilipino asin an saindang mga pamilya.
