Pigtawan duon an importansya kan pagprotehir sa salud nin isip kan mga paratukdo asin mga estudyante tinawan nin duon sa paagi kan manlaen-laen na programa na ipinaotob kan eskwelahan.
Sa intrevista kan Bombo Radyo Naga kay Edwin A. Datan Jr., LPT (Designated Spokesperson, Mabini Colleges, Inc.), an institusyon taon-taon na nagkokondusir nin recreation, retreat, asin Employees’ Day Out tanganing mabawasan an stress kan mga empleyado, mapakusog an pagkasararo kan mga empleyado, asin maipaabot an saindang pangkagabsan na karahayan.
Segun ki Datan, dakula an papel kan administrasyon sa pagmantenir kan karahayan kan mga paratukdo. Apwera sa team-building activities, regular man na naggigibo nin mga miting an eskwelahan para maaraman asin tulos na masimbagan an mga problema asin pangangaipo kan mga paratukdo, kabali na an mga isyung may kinaaraman sa mga pasilidad asin iba pang bagay na may kinaaraman sa saindang trabaho.
Pinag-olayan man ni Datan an naglalakop na paggamit kan AI sa larangan nin edukasyon. Sinabi niya na bakong maninigo na ipagbawal an paggamit kan AI, alagad kaipuhan na magkaigwa nin malinaw na mga polisiya tanganing maseguro an responsable asin tamang paggamit kaini. Idinoon man niya an importansya kan lubos na pag-assess kan mga paratukdo tanganing maseguro na an mga estudyante tunay na nakakasabot kan saindang mga leksyon asin dai sana nagsasarig sa AI tanganing matapos an mga akademikong gibohon.
Mientrastanto, sinabi ni Datan na importante para sa mga paratukdo na gamiton an mga makabagong estratehiya sa pagtukdo, kabale na an mga interactive activities asin an Socratic method tanganing mamantenir an interes kan mga estudyante, urog na an Generation Alpha. Sinabi niya na mas nagigin epektibo an pag-adal kun an mga leksyon konektado sa mga presenteng isyu asin sa mga aktuwal na eksperyensya kan mga estudyante.
Dugang pa kaini na padagos man an pagpromote kan Mabini Colleges kan Home Room Guidance Program bilang parte kan espwersos kaini na maprotektaran an mental health kan mga estudyante. Sa paagi kan programang ini asin sa aktibong partisipasyon kan guidance office asin administrasyon, natatawan nin magkakanigong suporta an mga estudyante asin paratukdo. Pigsuherir man ni Datan an pag-implementar nin mas mahigot na regulasyon sa paggamit kan social media kan mga jovenes tangarig na maprotektaran sinda sa bakong maninigong laog asin suportaran an saindang marahay na pagtalubo.
