Nagkaroon ng kalituhan sa pagdinig matapos magtanong si Senator-Judge Robin Padilla tungkol sa pinagmulan ng video na may kaugnayan kay Vice President Sara Duterte.
Sa pagtatanong ni Padilla, lumitaw na nagkaroon ng hindi pagkakaunawaan hinggil sa tinutukoy na “nag-record” ng video. Sa testimonya ni National Bureau of Investigation (NBI) Senior Agent John Mark Calilung, ipinaliwanag na siya ang nagsagawa ng screen recording ng video gamit ang isang application bilang bahagi ng proseso ng pagkuha at pagpreserba ng digital na ebidensiya.
Gayunman, nilinaw ni Padilla na hindi ang screen recording ang kanyang tinutukoy. Ayon sa senador, ang nais niyang matukoy ay ang mismong taong kumuha o nag-record ng orihinal na video ni Vice President Duterte.
Aniya, mahalagang matukoy ang orihinal na source ng video upang masuri at mapatunayan ang pagiging tunay o authenticity ng video material na iniharap bilang ebidensiya sa impeachment court.
Dahil dito, pansamantalang nagkaroon ng kalituhan sa pagdinig bago nalinaw ang pagkakaiba ng taong nagsagawa ng screen recording at ng umano’y orihinal na nag-record ng video na isinumite bilang bahagi ng ebidensiya ng prosekusyon.
