Binalot nin mahibog na aso gikan sa wilfire sa Canada sa dakulang parte kan Estados Unidos kan Huwebes, na nagtulod sa mga awtoridad na patanidan an publiko na magtinir sa laog kan harong sagkod sa mapupuwede.
An Detroit nakarekord kan pinakamaraot na kalidad kan aire sa kinaban kan Huwebes, na may Air Quality Index (AQI) na 600—doble kan lebel na pigkokonsiderar na “peligroso” kan U.S. Environmental Protection Agency (EPA).
Base sa datos kan Amerika, an aso nakaabot sa peligrosong lebel sa mga estado nin Minnesota, Michigan, Illinois, Ohio, asin dawa sa Ontario sa Canada.
An mga syudad nin Minneapolis, Milwaukee, asin Toronto nakarekord man nin peligrosong kalidad nin aire, mantang dai mababa sa 10 estado an nakaeksperyensya nin “bakong marhay” na kalidad nin aire.
An mga kamugtakan piglalaoman na maggrabe sa bilog na aldaw.
Sa New York, naireport man an kolor kahel na mga panganoron sa kalangitan asin naririsa man an mabatang parong kan aso.
Nangapudan an mga lokal na opisyal sa mga residente na limitaran an saindang oras sa luwas.
An mga tawong may helang sa puso asin baga, mga bados, mga gurang, asin iba pang mga grupong halangkaw an peligro inabisuhan man na magdanay sa laog kan harong.
Mientrastanto, an gobyerno kan Canada nagbareta na igwa pang 858 na aktibong kasulo sa nasyon, na 111 kaini an dai pa nakontrol. An mga probinsya nin Manitoba, Saskatchewan, asin Ontario an pinaka-natamaan.
