Kinumpirmar kan Malacañang na inaprubaran kan Office of the President (OP) an biyahe ni Vice President Sara Duterte sa limang nasyon poon Hulyo 16 hasta Hulyo 31, 2026.
Segun ki Presidential Communications Office (PCO) Undersecretary asin Palace Press Officer Claire Castro, inaprubaran kan OP an personal na biyahe kan Bise Presidente paduman sa Qatar, Germany, United Kingdom, Northern Ireland, asin Netherlands.
Magigirumduman na dai nadagos ni VP Sara an saiyang dating planong biyahe paduman sa Netherlands, South Korea, Belgium, Germany, asin United Kingdom poon Abril 23 hasta Mayo 15, 2026, makalihis niyang sabihon na naaprubaran sana sa huring oras an saiyang travel request.
Alagad pinalagan ni Castro an nasabing rason kan Bise Presidente.
Segun pa saiya, nagsumite nin travel request si VP Sara kan Abril 14. An pagproseso kaini kadalasan na inaabot nin limang aldaw, asin pirmeng ibinababa an Travel Authority sarong aldaw bago an nakaeskedyul kaining biyahe.
Tinawan duon man ni Castro na dai pinupugulan an Bise Presidente sa pagbibiyahe sa ibang nasyon. Patunay an mga nag-aging foreign travel niya na inaprubaran man, maski bakasyon o personal na biyahe na haloy an itinagal.
Sa opisyal na pahayag kan Office of the Vice President (OVP), sinabi na kaiba sa itineraryo kan Bise Presidente an pag-agi sa Qatar, pagpartisipar sa sarong forum asin Filipino Community o FilCom event sa United Kingdom, asin pagbisita man sa Netherlands.
An mga aktibidad na ini obhetong mapakusog an pakikipagkoordinar sa mga Overseas Filipino asin isulong an interes kan Pilipinas sa ibang nasyon.
Kaiba man sa itineraryo kan bise presidente an kombinasyon nin opisyal na foreign travel asin personal na engagement.
Tinawan duon kan OVP na mayo nin pondo kan gobyerno an ginamit para sa bilog na biyahe ni VP Sara.
Mantang ini, nagpapatugad na handa asin operational an Office of the Vice President sa saiyang mga Disaster Response Mechanism sa panahon nin emerhensiya.
Padagos man na implementasyon kan OVP an saiyang mga programa asin proyekto sa paagi kan sampulong satellite office kaini sa bilog na nasyon.
