Naka full force an Charlie Company kan Philippine Army Reserve sa pagtao nin seguridad asin suporta sa mga aktibidad kan Libmanan katakod kan selebrasyon kan kapiestahan kan banwaan.
Segun ki Army Reservist Captain asin Municipal Councilor Gerardo “Dondon” Atienza, na kabali sa saindang preparasyon an pakikipagkoordinar sa Disaster Risk Reduction (DRR) Meeting, na kun sain ipinadara niya si Sergeant Polin tanganing makikoordinar sa mga ahensya asin lokal na Gobyerno para sa marhay na pagdaraos kan kapistahan.
Dagdag pa kan opisyal, nakatalaga an mga reservist kan Charlie Company sa nagkapirang aktibidad sa bilog na selebrasyon.
Kaiba digdi an pagmantiner kan kaayusan sa civil-military parade, pag-alalay sa mga prosisyon, pagtabang sa media coverage, asin pagtao nin suporta sa mga aktibidad kan mga estudyante asin iba pang mga programang inihanda para sa Pista.
Tinawan duon man kaini na an Charlie Company kan Philippine Army Reserve na bako sanang nakatalaga sa panahon kan kapiestahan kundi pirming handang magtabang sa mga pangangaipo kan banwaan sa panahon nin kalamidad, asin iba pang mga pagkakataon na kinakaipohan nin serbisyo kan mga reservist.
Segun pa digdi, bilang pagbisto sa padagos na serbisyo asin pakikipagtabangan kan Charlie Company, nagtagama an Lokal na Gobyerno kan Libmanan nin sarong nakatalagang opisina para sa reservist unit tanganing lalo pang mapakusog an koordinasyon asin mapadali an pag-aksyon sa mga pangangaipo kan komunidad.
