Tinawan-duon kan sarong ni Propesor kan Central Bicol State University of Agriculture (CBSUA), an importansya kan pagmantenir kan maray na daga sa paagi kan tamang pagmanehar asin paggamit kan magkakanigong soil amendments.
Sa intrevista kan Bombo Radyo Naga kay Dr. Lorena Ferrer-Hernandez – Professor VI, CBSUA Faculty and Soil Learning Facilities In-Charge, sinaysay kaini na an soil health bako sana nakabase sa laog kan sustansya kundi magin sa pisikal asin biolohikal na propyedad kan daga. An mga senyales kan bakong marahay na daga kabali an pagbaba kan ani, pag-ipit kan daga, maluyang pagsupsop nin tubig, pag-ubos, asin mga pagbabago sa pH kan daga.
Nangapudan man an eksperto sa mga paraoma na magsagibo nin soil testing antes maggamit nin abono o soil amendments para madeterminaran an pH, nitrogen, phosphorus, potassium, asin iba pang propyedad kan daga. Makakatabang man suboot an mga mobile soil laboratory kan Department of Agriculture na mairani sa mga paraoma an soil testing.
Paliwanag ni Hernandez, marikas an pagtao nin sustansya kan mga chemical fertilizers alagad pwedeng magkaigwa nin negatibong epekto kun sobra o sa halawig na panahon an paggamit kaini. Mientrastanto, an crop residues asin ati nin hayop pwedeng gamiton bilang mga organikong soil amendments na pwedeng gibohon na kompost, vermicompost, bokashi asin iba pang klase nin organikong materyales tanganing mapakarhay an pisikal, kemikal asin biolohikal na kamugtakan kan daga.
Pig-enkaminar ni Hernandez an mga paraoma asin mga estudyante sa agrikultura na mas masabutan asin pag-adalan an daga bago magpili nin sarong gawi sa pamamahala. Tinawan niya nin duon na an salud kan daga importante sa organiko asin sustenableng agrikultura nin huli ta an daga sarong natural na yaman na halawig na marhay an pagbilog asin dipisil na ibalik kun ini lubos nang naraot huli sa pag-ubos asin salang pagmanehar.
