Tinawan-duoon kan tagapagtaram kan Deped-Camarines Sur, kaipuhan nin preparasyon asin orientation sa mga eskwelahan antes ikundisir an Nationwide School Safety Drill sa September 3.
Sa intrevista kan Bombo Radyo Naga ki Atty. Salvador Bogs Pelingon – Division Information Officer, Deped-Camarines Sur, sinaysay kaini na an pag re-schedule kan nasambitang drill an tanganing matawan nin maninigong oras an mga eskwelahan na makapagpreparar, lalo na sa pag-orient sa mga estudyante, asin importante na maaraman kan gabos an mga proseso mga dapat gibuhon antes ikundisir an drill.
Sinabi pa kaini na primerong bes na gigibohon an Active Shooting Drill sa mga eskwelahan, kaya tig-eenkaminar an mga school authorities na amay inpormaran asin ma-orient an mga learners, teachers, asin iba pang stakeholders manungod sa aktibidad.
Siring man, an nasambitang drill ikokoordinar kan mga eskwelahan sa lokal na gobyerno asin sa iba pang mga ahensya na may responsabilidad sa seguridad, tanganing magin organisado asin epektibo an pagkundisir kaini. An suporta asin pakikipagkoordinasyon kan lokal na gobyerno makakatabang sa mga eskwelahan sa pagpreparar kan mga kinakaipuhang kagamitan, personnel, asin iba pang seguridad na kaipuhan para sa maayos asin ligtas na pagibo kan drill.
Pig-esplikar man kaini na kun may maeksperyensiyahan man na arog kaining pangyayari kinakaipuhan na may lugar na ligtas asin pwedeng dumanan an gabos, mga aki o estudyante, maestra asin iba pa.
Pig-enkaminar man ni Pelingon an gabos na magpartisipar sa nasambitang drill, huli an pinakaobheto kaini iyo an pagpapakusog kan seguridad, kasalbaduhan, asin maprotehiran an mga kaakian.
