Isinairarom an nagkapirang banwaan sa probinsya nin Pangasinan sa state of calamity huli sa daing ontok na pag-uran dara kan habagat-sulnupan na nagresulta sa grabeng pagbaha sa nagkapirang lugar.
Kabale sa mga ipinasairarom sa state of calamity iyo an Infanta, Bugallon, Lingayen, Mangatarem, Bayambang, Sta. Barbara, Gupan City, asin Mangaldan.
Mientrastanto, mantenidong nasa red warning o makusog na pag-uran an Pangasinan. Nin huli kaini posible an grabeng pagbaha asin pagrasay nin daga, orog na sa mga lugar na madaling mabaha asin mabagsak nin daga.
Padagos an rescue and response operations kan Pangasinan Provincial Disaster Risk Reduction and Management Office (PDRRMO) para sa mga pamilyang grabeng apektado kan baha.
Sa ibong kan padagos na pag-uran asin delikadong sitwasyon, padagos man giraray an monitoring, rescue operations, evacuation assistance, asin iba pang kinakaipuhan na mga lakdang para masiguro an kaligtasan asin karahayan kan mga residentes.
