Pansamantalang ikinansela asin na-delay an labi 200 na flights pasiring asin paluwas sa kabisera kan Jakarta Indonesia nin mag-oomagahon aldaw nin Domingo, ala-1:30, Setyembre 6, Western Indonesian Time.
Kasunod kaini an pansamantalang pagsara kan Soekarno-Hatta International Airport matapos mag-alburuto an Bulkang Anak Krakatau asin magbuga nin mahibog na abo.
An pagsara kan erpuerto nakaapektar sa kinakarkulong 23,000 na mga biyahero na na-stranded.
Mientrastanto, sigun sa geological agency kan Indonesia, nagpahiling na nin mga senyales nin pag-aktibo an nasabing bulkan kan Sabado, antes ining mag-alburuto kan alas-3:53 kan mag-oomagaahon kan Domingo, Western Indonesian Time.
Nakaabot sa mga parte kan Jakarta asin sa probinsya kan Lampung an abo na ibinuga kan bulkan, alagad mayo man nin nairehistrong biktima o danyos an mga lokal na awtoridad.
Kan 2018, nairehistro an pinakamapaminsalang pagsabog kan Bulkang Anak Krakatau sa modernong panahon. Nagresulta ini sa tsunami na nagin kawsa kan pagkagadan nin 430 katao.
