Ipigdeklara kan Sangguniang Panlalawigan kan Camarines Norte an state of calamity kan Setyembre 15 huli sa matinding kakulangan sa tubig konektado sa epekto kan El Niño, kun saen nakakaapektar sa kabuhayan, agrikultura asin kalusugan kan mga residente.
Sa intrevista kan Bombo Radyo Naga Ki Atty. Cynthia Osillada Gonzales – Provincial Legal Officer, Camarines Norte, sinaysay kaini na isinagibo an deklarasyon matapos irekomendar kan bilog na konseho nin Provincial Disaster Risk Reduction and Management Council (PDRRMC) an pagpapatuman kaini.
Base sa report asin forecast kan PAGASA, an Camarines Norte nakakaeksperyensiya nin extreme drought o matinding tagmara.
Segun sa Department of Agriculture, nagbaba nin 29 porsyento an rice production mantang sadit lamang na parte nin mga rice field an posibleng tanoman huli sa kakulangan nin tubig.
Dugang pa, dakula an nagin epekto kaini sa sektor kan agrikultura asin nagtao ini kahad itan sa suplay asin seguridad sa pagkakan.
Apektado man kan krisis an sektor kan kalusugan kun saen kabale sa mga naitalang problema an padagos na paglangkaw nin kaso kan dengue, na iniuugnay sa kondisyon na dara kan kakulangan sa malinig asin sapat na suplay nin tubig.
Mientrastanto, iniulat man kan National Electrification Administration (NEA) an hababang water level na nasa 26 sentimetro, na itinuturing na low level.
Haloy na suboot nakakaeksperyensya an mga residente nin problema sa supply nin tubig, alagad mas lalong naggrabe huli sa epekto kan El Niño. Huli kaini, nagdesisyon an gobyerno probinsyal na magdeklarar nin state of calamity para maparikas an pagresponde asin pagtao nin kinakaipuhan na ayuda.
Naglaan man nin pondo an gobyerno para sa mga residentes na naapektaran an kabuhayan kan krisis. Kabali digdi an calamity fund asin an Local Disaster Risk Reduction and Management Fund, na igwa nin dai mababa sa 5 porsyento kan pondo kan lokal na gobyerno para sa pag-andam asin pagresponde sa kalamidad.
Sa panginginot ni Gobernador Dong Padilla, pigsisierto man kan Provincial Government of Camarines Norte na gigibohon kaini an gabos nin makakaya tanganing matabangan an mga residenteng apektado kan krisis sa tubig.
Padagos na tutugunan an pangangaipuhan kan mga residente asin gagamitin nin tultol asin naaayon sa obheto an mga pondong ilalaan para sa krisis sa tubig.
