Nagluluwas sa inisyal na imbestigasyon na narekober sa vault kan saiyang ama na empleyado kan DepEd Region 12 na nagtutukdo man nin gun safety an 9mm na pistola na ginamit kan suspechado sa nangyaring pambabadil sa Banga National High School.
Nagpromesa si House Senior Deputy Speaker Dinand Hernandez na matao nin tulos na tabang sa mga biktima asin pamilyang apektado kan nasambitan na insidente sa South Cotabato.
Sa sarong intrevista, sinabi ni Hernandez na pigsugo niya an saiyang mga tawohan na suportaran an mga biktima na pigbubulong ngonian mantang plano niyang magbalik sa Mindanao kaiba si Education Secretary Sonny Angara tanganing bisitahon an eskwelahan asin an mga pamilya.
Pigduon kan mambabatas an importansya kan pagpapakusog kan seguridad sa mga eskwelahan, pagpakusog kan mental health support para sa mga estudyante, asin paglikay sa paglakop kan dae kumpirmadong impormasyon mantang padagos an imbestigasyon.
Basado sa pinakahuring report, tolong iridong estudyante an nakaluwas na sa ospital mantang apat pa an padagos na pigbabantayan asin pigbubulong sa manlaen-laen na health facilities sa rehiyon.
