Nagpaluwas nin show-cause order an Department of Public Works and Highways (DPWH) kontra sa sarong contractor na sinasabing nagpadagos kan konstruksyon sa lugar na sakop nin cease-and-desist order sa Taguig City.
Segun ki DPWH Secretary Vince Dizon, tulos sindang naghiro matapos ireport ni Senador Panfilo Lacson an sinasabing pagpadagos kan konstruksyon sa nasabing lugar.
Inatasan kan DPWH an contractor na magpaliwanag asin sumunod sa pagboot na ipundo an gabos na construction activities na may koneksyon sa sinasabing ilegal na reclamation sa Laguna de Bay.
Sinabi ni Dizon na base sa pinakahuring inspeksyon kan ahensya, mayo nang mga trabahador na nagpapadagos kan konstruksyon sa lugar.
Dai pa tinutukoy kan DPWH an posibleng multa o iba pang kapadusahan asin hihilngon nguna an magigin paliwanag kan contractor.
Idinugang ni Dizon na kaipuhan na sunudon kan gabos na contractor an mga pagboot kan DPWH, kaiba an cease-and-desist order.
