Matoninong asin matrayumpo an ginibong Peñafrancia Festival celebration asin fluvial procession kan nakalihis na Sabado.
Sa intrevista kan Bombo Radyo Naga ki Christopher Jhun D. Zantua, Public Information Officer kan Emergency Operations Center-Incident Management Team, sinabi kaini na kinaipuhan na i-adjust an schedule kan fluvial procession huli sa kamugtakan kan tubig asin sulog kan Naga River. An mga awtoridad nagmomonitor kan lebel kan tubig sa laog nin pirang semana bago an prusisyon asin nadeterminaran na an pagpadagos sa paglayag kan pagoda sa orihinal na nakaiskedyul na oras bakong ligtas. Kinaipuhan nindang halaton na maglangkaw an lebel kan tubig tanganing maseguro na an pagoda makakaagi nin ligtas sa gilid kan salog.
Sa ibong kan biglang pagbabago kan iskedyul, sinabi ni Zantua na an Incident Management Team andam na marhay asin igwa nin mga plano sa emerhensya kun an kamugtakan kan salog magin bakong paborable.
Imbes na magbaba an bilang kan mga deboto huli sa pagkaatraso, narisa ni Zantua an paglangkaw kan mga tawo. Durante kan peak hours mga alas 9:00 nin banggi, an bilang kan mga deboto, peregrino, asin voyadores sa manlaen-laen na parte kan syudad pigkakarkulong uminabot sa 1.2 milyon.
Mientrastanto, sarong baroto an naglubog mantang nagpapadagos an fluvial procession. Tulos na nagresponde an mga rescuers na nakadestino sa gilid kan Naga River—na nakaposisyon duman bago pa man magpuon an prusisyon. Kabali digdi an mga volunteer rescuers hale sa manlaen-laen na munisipyo, disaster response personnel, Philippine Coast Guard, asin iba pang support groups. Segun ki Zantua, maabot sa 11,000 na mga boluntaryo hale sa manlaen-laen na ahensya an nagpartisipar sa operasyon, mantang labi sa 2,000 na mga miyembro kan support group an nadeploy sa gilid kan Naga River kan aldaw kan prusisyon. Huli kaini, tulos na nasimbagan an insidente, asin ligtas na an mga parasira na nakalunad sa nabaliskad na baroto.
May nagkapirang saradit na insidente man na naitala, kabali an mga kaso nin pagkadismayo asin nagkapirang isyung may relasyon sa seguridad. Dawa siring, sinabi kan opisyal na, sa kabilogan, an operasyon kan Incident Management Team nagpadagos nin marahay asin sa organisadong paagi.
Tinawan man nin duon ni Zantua na maabot sana sa 200 katawo an tinutugutan na maglunad sa pagoda, susog sa kapasidad kaini asin sa mga safety protocols na pigpapaotob.
